មីនសញ្ញាលេខបូក ជាច្រើនគ្រាប់ ត្រូវបានពលរដ្ឋប្រមូល តាមស្រែនិងដំបូកក្នុងព្រៃយកមកទុកនៅទីកន្លែងមានសុវត្ថិភាព
ខេត្តបាត់ដំបង ៖ ស្រុករុក្ខគិរី គ្រាប់មីនសញ្ញាលេខបូក ចំនួន២៦គ្រាប់ ដែលក្នុងនោះភាគច្រើន នៅមានគុណភាព ១០០% ត្រូវបានប្រជាពលរដ្ឋឈ្មោះហែមសុផល អាយុ ៥៦ ឆ្នាំរស់នៅភូមិព្រៃជីក ឃុំព្រៃព្រៃជីកស្រុករុក្ខគីរី ខេត្តបាត់ដំបងប្រមូលយកមកទុក នៅកន្លែង(មានសុវត្ថិភាព)រងចាំសុីម៉ាកមកយករក្សាទុក ប្រជាពលរដ្ឋរូបនេះ ឃើញគ្រាប់មីនទាំងនេះ នៅរាយប៉ាយតាមវាលស្រែនិងដំបូកក្នុងព្រៃនានា ក្នុងតំបន់ដែលអតីតជាសមរភូមិក្តៅរវាងកងទ័ពរដ្ឋាភិបាលកម្ពុជានិង ជាមួយនិងយោធាខ្មែរក្រហមកាលពីសម័យមុន។
សមត្ថកិច្ចបានបញ្ជាក់ថា កាលពីវេលាម៉ោង៨និង៣០នាទីព្រឹក ថ្ងៃទី៦ ខែកញ្ញា ឆ្នាំ២០២០ មានប្រជាពលរដ្ឋ ឈ្មោះហែមសុផលអាយុ ៥៦ឆ្នាំរស់នៅភូមិឃុំខាងលើដែល បានប្រមូលគ្រាប់មីនចំនួន២៦គ្រាប់ ដែលជា ប្រភេទ ( មីនលេខបូក ផលិតនៅប្រទេសសូវៀត) យកមកទុកមួយកន្លែងដែលមានសុវត្ថិភាព ដែលក្នុងនោះខូចគុណភាពចំនួន៦គ្រាប់ ឯក្រៅពីនេះនៅល្អទាំងអស់។
បន្ទាប់មកប្រជាពលរដ្ឋរូបនោះ បានរាយការណ៍ទៅប្រាប់លោកមេភូមិ និងរាយការណ៍ឲ្យកម្លាំងអាវុធហត្ថចុះពិនិត្យ។ក្រោយពីត្រួតពិនិត្យរួចកម្លាំងកងរាជអាវុធហត្ថ ក៏បានរាយការណ៍ជូនលោក គា ជឿម នាយកសម្របសម្រួលគ្រាប់យុទ្ធភណ្ឌមិនទាន់ផ្ទុះប្រចាំស្រុកមោងឬស្សី និងស្រុករុក្ខគិរី ដើម្បីប្រមូលយកទៅរក្សាទុកទៅតាមជំនាញ។ តាមការសន្និដ្ឋានរបស់ជំនាញគ្រាប់មីនទាំងនេះ គឺបន្សល់ទុកតាំងពីសម័យសង្គ្រាមមកម្ល៉េះ៕ដោយមុតចិត្រា
