លោកជំទាវ ដាំ ដារីនី សមាជិកាគណៈកម្មាធិការកណ្ដាល និងជាប្រធានផ្នែកសិល្បៈ និងកីឡា នៃយុវជនគណបក្សប្រជាជនកម្ពុជាថ្នាក់កណ្ដាល ព្រមទាំងឯកឧត្តម អនុប្រធាន សមាជិក ផ្នែកសិល្បៈ និងកីឡា បានអញ្ជើញចុះសួរសុខទុក្ខក្រុមសិល្បៈយុវជនល្ខោនខោល និងបុរាណជំនាន់ថ្មី
នៅថ្ងៃអាទិត្យ ១០កេីត ខែកត្ដិក ឆ្នាំរោង ឆស័ក ព.ស.២៥៦៨ត្រូវនឹងថ្ងៃទី១០ ខែវិច្ឆិកា ឆ្នាំ២០២៤
លោកជំទាវ ដាំ ដារីនី សមាជិកាគណៈកម្មាធិការកណ្ដាល និងជាប្រធានផ្នែកសិល្បៈ និងកីឡា នៃយុវជនគណបក្សប្រជាជនកម្ពុជាថ្នាក់កណ្ដាល ព្រមទាំងឯកឧត្តម អនុប្រធាន សមាជិក ផ្នែកសិល្បៈ និងកីឡា បានអញ្ជើញចុះសួរសុខទុក្ខក្រុមសិល្បៈយុវជនល្ខោនខោល និងបុរាណជំនាន់ថ្មី ដែលបានបង្កើតឡើងរយៈពេល៩ឆ្នាំមកហើយ ដែលមានសមាជិកចំនួន៥០០នាក់ ឆ្លៀតក្នុងឱកាសនេះលោកជំទាវ ប្រធាន ក៏បានកោតសសើរចំពោះ សមិទ្ធផលរបស់ក្រុមសិល្បៈយុវជនល្ខោនខោល ដែលបានខិតខំយ៉ាងសកម្មចូលរួមនូវសកម្មភាពកិច្ចការសង្គមជាច្រើនទាំងក្រុងស្រុក និងក្រៅស្រុក ព្រមទាំងបានចូលរួមសម្តែង និងផ្សព្វផ្សាយវប្បធម៌ល្ខោនខោលក្នុងព្រឹត្តិការណ៍នានា នៅលើឆាកអន្តរជាតិផងដែរ នឹងសូមប្អូនៗ បន្តពង្រឹងសកម្មភាពហ្វឹកហាត់ជំនាញល្ខោនខោលប្រវត្តិសាស្ត្រ ដែលដូនតាបានបន្សល់ទុកឲ្យយុវជនជំនាន់ក្រោយអោយកាន់តែល្អប្រសើរបន្ថែមទៀត ក្នុងនោះផងដែរ លោកជំទាវ ប្រធាន ព្រមទាំងឯកឧត្ដម អនុប្រធាន សមាជិក ផ្នែកសិល្បៈ និងកីឡា បាននាំយកអំណោយមួយចំនួនរួមមាន ទឹកសុទ្ធ៣០កេស នំស្រួយលីលី១០កេស កាហ្វេកញ្ចប់៣០កេស តែកញ្ចប់៣០កេស និងថវិកាចំនួន២លានរៀល។
ជាចុងក្រោយលោកជំទាវ ក៏បានពាំនាំការសួរសុខទុក្ខរបស់សម្តេច មហាបវធិបតី ហ៊ុន ម៉ាណែត អនុប្រធានគណបក្សប្រជាជនកម្ពុជា និងជាប្រធានយុវជនគណបក្សថ្នាក់កណ្តាល ដល់យុវជនល្ខោនខោល និងបុរាណជំនាន់ថ្មីទាំងអស់ សូមបន្តអនុវត្តផែនការសកម្មភាពឲ្យសកម្ម បង្កើននូវប្រសិទ្ធភាព ព្រមទាំងចូលរួមថែរក្សាវប្បធម៌ សិល្បៈល្ខោនខោលបន្តទៅមុខបន្ថែមទៀត ។
