ស្ត្រីវ័យក្មេងម្នាក់ បានបាត់ខ្លួន ដោយគ្មានមូលហេតុ ខណៈប្តីថា មិនធ្លាប់មានរឿងឈ្លោះទាស់ទែងគ្នាអ្វីទាល់តែសោះ នៅប៉ៃ លិន
ប៉ៃ លិន ៖ ហេតុការណ៍បាត់ខ្លួនស្ត្រីម្នាក់នេះ បានកើតឡើងកាលពី ថ្ងៃទី២៦ ខែកក្កដា ឆ្នាំ២០២២ ។បន្ទាប់ពីបានទទួលពាក្យបណ្ដឹងលើករណី ស្ត្រីវ័យក្មេងម្នាក់ បានបាត់ខ្លួនពីឈ្មោះ
វិន ស៊ាត ភេទប្រុស អាយុ៤២ឆ្នាំ រស់នៅភូមិតាង៉ែនក្រោម ឃុំស្ទឹងកាច់ ស្រុកសាលាក្រៅ ខេត្តប៉ៃ លិន (ត្រូវជាប្តី) កម្លាំងនគរបាលនៃអធិការដ្ឋានស្រុកសាលាក្រៅ កំពុងធ្វើការស្រាវជ្រាវ រកស្ត្រីដែលបាត់ខ្លួនដោយគ្មានមូលហេតុ ។ ចំណែកឯប្តីមានការអន្ទះសារបារម្ភពីសុវត្ថិភាពរបស់ប្រពន្ធខ្លួន ខណ:មិនធ្លាប់មានរឿងឈ្លោះទាស់ទែងគ្នាអ្វីទាល់តែសោះ ស្រាប់តែប្រពន្ធលួចរត់ទៅប្រទេសថៃបាត់តែម្តង។
ស្ត្រីបាត់ខ្លួនមាន ឈ្មោះ ឆន ស្រីគីន ហៅទៀន អាយុ២៤ឆ្នាំ មានទីលំនៅក្នុងភូមិបឹងព្រលិត ឃុំស្ទឹងកាច់ ស្រុកសាលាក្រៅ មានប្តី ឈ្មោះ វិន ស៊ាត អាយុ៤២ឆ្នាំ បានរៀបការអស់រយ:ពេលជាង៣ឆ្នាំមកហើយ អត់ទាន់មានកូននៅឡើយទេ ។
ប្រភពពីបុរសម្នាក់ឈ្មោះ សយ សាប៊ន់ ភេទប្រុស អាយុ៣៦ឆ្នាំ ជាអ្នករត់ម៉ូតូឌុប រស់នៅភូមិតាង៉ែនលើ សង្កាត់ប៉ៃលិន ក្រុងប៉ៃលិន បានឱ្យដឹងដែរថា កាលពីវេលាម៉ោងប្រហែល១២ និង២០នា ទីរសៀលថ្ងៃទី២៥ ខែកក្កដា ឆ្នាំ២០២២ ស្ត្រីខាងលើបានទូរស័ព្ទហៅលោកឱ្យឌុបយកទៅច្រកទ្វារអន្តរជាតិព្រំ ដោយនាងបានប្រាប់ស្វាមីថា នាងទៅទារលុយគេនៅក្បែរច្រកព្រំដែននោះ រួចលោកក៏ឌុបចេញទៅភ្លាមៗតែម្តង។
ប្រភពបន្តទៀតថា ពេលទៅដល់ច្រកទ្វារអន្ដរជាតិព្រំ លោកក៏បានដាក់នាងចុះ ហើយសង្កេតឃើញនាងចូលទៅទិញសំបុត្រឆ្លងដែន និងប្រើលិខិតឆ្លងដែន ចូលទៅក្នុងប្រទេសថៃ ។ ក្រោយមក លោកក៏ជិះម៉ូតូម្នាក់ឯង ត្រឡប់ទៅរកឌុបម៉ូយនៅក្នុងក្រុងប៉ៃ លិនវិញ លុះរហូតដល់វេលាម៉ោង១ និង៤៥នាទីរសៀលថ្ងៃដដែល ស្វាមីនាងក៏បានទាក់ទងទៅសួរនាំរកប្រពន្ធ ដោយលោកប្រាប់ថា នាងបានឆ្លងដែនចូលទៅទឹកដីប្រទេសថៃបាត់ហើយ។
ប្តីស្ត្រីនេះបានខំប្រឹងព្យាយាមទាក់ទងទៅរកប្រពន្ធជាច្រើនលើកច្រើនសា តែមិនបានសោះ ព្រោះនាងបិទទូរស័ព្ទ រហូតមកដល់ឥឡូវ ក៏សម្រេចចិត្តដាក់ពាក្យបណ្ដឹងតែម្ដង។ ពាក់ព័ន្ធនឹងបញ្ហានេះ កម្លាំងប៉ុស្ដិ៍នគរបាលរដ្ឋបាលស្ទឹងកាច់កំពុងធ្វើការស្រាវជ្រាវស្វែងរកស្ត្រីដែលបានបាត់ខ្លួននេះ ៕